बदलत्या काळाची गरज बनलेला अनोखा शिवविवाह संपन्न

 

  सोमवार दि. 24 एप्रिल रोजी दुपारी कुरुल येथील दोस्ती मंगल कार्यालयात सिद्धेवाडी येथील ग्रामपंचायत सदस्य रणजितसिंह संभाजी जाधव यांचा शिवविवाह विटे येथील आप्पासाहेब राजाराम गायकवाड यांची कन्या प्रांजली हिच्यासोबत झाला. या शिवविवाहात समाजाला आवश्यक असलेल्या काही महत्त्वाच्या गोष्टींची सुरुवात केली गेली. सर्वात महत्त्वाची बाब म्हणजे वधू वरांवर अक्षता ऐवजी फुलांची उधळण करण्यात आली. अंतरपाट न धरता वधु-वर समोर तोंड करून उभे होते. स्टेजवर कसलीही गर्दी न करता सर्व वऱ्हाडी मंडळींना वधुवर व्यवस्थित दिसतील अशी व्यवस्था केली होती. विवाहाची सुरुवात राजमाता जिजाऊ, छत्रपती शिवाजी महाराज, संत तुकाराम महाराज, स्वर्गीय आजोबा शिवदास जाधव सर आणि स्व. सुधाकरपंत मालक यांच्या प्रतिमांचे पूजन करून करण्यात आली. जिजाऊ वंदना, शाहू- फुले-आंबेडकर यांचे विचार, सावित्रीबाई फुले यांचे कार्य, संत तुकाराम यांचे अभंगातील विचार, बहुजन समाजातील महामानवांचे प्रेरणादायी विचार यांची महती सांगणारी फक्त पाचच मंगलाष्टकं गायली गेली. टाळ्यांच्या कडकडाटात वधू-वरांना शुभाशीर्वाद दिले. हार घालताना करवले मित्रांनी ना वराला उचलले ना वधूला. कसलीही गडबड, कसलाही गोंधळ होऊ न देता अगदी व्यवस्थित हा सोहळा पार पडला. लग्न सोहळ्याचे सर्व विधी गादेगाव येथील शिवश्री तुकाराम बागल महाराज यांनी केले. यावेळी उपस्थितांचे स्वागत  शिवश्री सी.व्ही.जाधव सर, वराचे काका शशिकांत जाधव, शहाजी जाधव, पोलीस पाटील दत्ता जाधव, डी.बी. जाधव सर, मामा राम शिंगाडे व उपसरपंच लक्ष्मण गोडसे सर यांनी केले.*

               *या विवाह सोहळ्यासाठी पांडुरंग परिवाराचे युवा नेते प्रणव मालक परिचारक, जि.प. सदस्य वसंतनाना देशमुख, पंडितराव भोसले साहेब,जकराया कारखान्याचे एम डी सचिन जाधव, मोहोळचे माजी सभापती मानाजी माने, विठ्ठलचे संचालक दशरथ जाधव (आबा), पांडुरंगचे माजी संचालक नागनाथ शिंदे, सहकार शिरोमणीचे माजी संचालक तानाजी जाधव, जि.प. चे जलसंधारण समन्वयक सचिन जाधव, सिद्धेवाडीच्या सरपंच सौ. रोहिणी जाधव, सारंग जाधव, माजी सरपंच श्रीकांतबाबा जाधव, मराठा सेवा संघाचे जिल्हाध्यक्ष तात्यासाहेब पाटील, पंढरपूर तालुका अध्यक्ष नितीन जाधव सर, संभाजी ब्रिगेडचे जिल्हाध्यक्ष सोमनाथ राऊत, पालवणचे माजी सरपंच परमेश्वर पाटील, सिद्धेवाडीचे सर्व आजी-माजी ग्रामपंचायत सदस्य, रामभाऊ जाधव चेअरमन, बाबुराव गोडसे चेअरमन, बालाजी जाधव, चंद्रदीपक भालेकर गुरुजी, तंटामुक्तीचे अध्यक्ष बजरंग जाधव, येनकीचे अध्यक्ष भास्कर इंगळे, मगरवाडीचे सुरेशतात्या सावंत, विटे सेवा  सोसायटीचे चेअरमन आमसिद्ध गायकवाड, येणकी येथील गौतम खरात वकील, पत्रकार देवीदास नाईकनवरे, पत्रकार तानाजी जाधव, रमेश जाधव सर, एम बी जाधव, नितीन पाटील, सुधाकर शिंदे आदि मान्यवर यावेळी उपस्थित होते. हारतुरे, फेटे किंवा मानपान असा कुठलाही बडेजाव न करता सर्वांचे स्वागत गुलाबपुष्प देऊन शब्दसुमनांनी केले. महाराष्ट्राची अस्मिता जागृत करण्यासाठी आणि हळूहळू का होईना पण समाजाच्या भल्यासाठी अशा विवाहांची संख्या वाढत राहिली पाहिजे असे प्रत्येकजण म्हणत होता.