पंढरपूर कृषी उत्पन्न बाजार समिती निवडणूक कोण बाजी मारणार?

पंढरपूर (प्रतिनिधी) ऐन उन्हाळ्यात उन्हाचा पारा वाढत असतानाच बाजार समितीच्या निवडणुकीने पंढरीच्या राजकीय क्षेत्रात वातावरण ढवळून निघत आहे. सत्ताधारी माजी आमदार श्री प्रशांत परिचारक गटाच्या पाच जागा बिनविरोध निवडून आलेल्या आहेत. नागनाथ मोहिते, वसंत चंदनशिवे, शिवदास ताड, यासीन बागवान, सोमनाथ डोंबे हे सभासद बिनविरोध निवडून आले आहेत,पण कट्टर विरोधक श्री अभिजीत पाटील यांनी माघार घेण्यास ठाम नकार दिल्याने आता १३ जागांसाठी ३२ उमेदवार निवडनुकीच्या आखाड्यात उतरले आहेत. राजकीय शत्रुत्व टाळण्यासाठी भगीरथ भालके, कल्याणराव काळे यांनी ऐनवेळी माघार घेतली आहे. यामुळे निवडणुकीतील थरार संपला असून परिचारक गट पुन्हा सत्ता काबीज करण्यासाठी यशस्वी होतील, असा अंदाज राजकीय विश्लेषक, जाणकार व्यक्त करीत आहेत.ही निवडणूक बिनवरोध होण्यासाठी परिचारक गटाने सुरुवातीपासूनच लवचिक धोरण अवलंबिले होते तसेच विरोधकांना काही  जागा देण्याचे मान्य केले होते.

पण मनसे चे श्री दिलीप धोत्रे व श्री विठ्ठल साखर कारखान्याचे अध्यक्ष अभिजित पाटील यांनी सडेतोड भूमिका घेत आव्हान कायम ठेवले आहे. श्री विठ्ठल परिवाराच्या बैठकीत एकमत न झाल्याने हा परिवार एकत्र आला नाही.आगामी निवडणुका नजरे समोर धरून अभिजीत पाटील तगडे आव्हान निर्माण करीत आहेत. आता घोडा मैदान जवळ असून लवकरच कौन, कितने पानी मे,हे समजून येणार आहे.

उद्या चळे येथील दरलिंग महादेव मंदिरात परिचारक गटाचा प्रचाराचा नारळ वाढविला जाणार असून निवडणुकीची रणधुमाळी वाढणार आहे.