पंढरपूरकरांचा कोट्यावधी रुपयांचा निधी गेला परत

 …तर आमदार साहेब राजीनामा द्या अन्‌ मस्तवाल अधिकाऱ्यांची मस्ती जिरवा – श्रीकांत शिंदे.

.केंद्रात व राज्यात तुमची सत्ता असताना अडीच कोटीचा निधी प्रस्ताव न दिल्यामुळे गेला परत.

पंढरपूर (प्रतिनिधी) 

पंढरपूर- सध्या देशात व राज्यात भारतीय जनता पार्टीचे सरकार असताना ही पंढरपूर मंगळवेढा मतदार संघाचे भाजपचे आमदार समाधान आवताडे यांना पंढरपूरातील शासकीय अधिकारी जुमानत नसल्याचे भीषण वास्तव समोर आलेले आहे.  दोन्ही तालुक्यात पर्यटन विभागाचा निधी मिळावा यासाठी आ. आवताडे यांनी पर्यटन विकास मंत्री ना. मंगलप्रभात लोढा यांच्याकडे पाठपुरावा करून पाच कोटी निधी मिळावा म्हणून दि २१ जानेवारी रोजी   पत्र देऊन विनंती केली होती. यावरती मंत्री महोदय यांनी तत्काळ जिल्हाधिकारी यांना याबाबत तपासणी करण्याबाबत आदेश दिले होते. यानुसार जिल्हा नियोजन समितीकडून कार्यवाही करण्यात आली. यामध्ये फक्त मंगळवेढा येथील संबंधित अधिकारी यांनी अंदाजपत्रक सादर केल्याने त्याठिकाणी अडीच कोटी निधी मंजूर मंजूर झाला.मात्र पंढरपूर तालुक्यातील अंदाजपत्रक सादर न केल्याने हा निधी परत गेला आहे, ही निश्चितच खेदजनक बाब आहे. कारण सरकार आले निधी द्यायला आणि अधिकारी नको म्हणतात घ्यायला असे म्हणण्याची वेळ आता पंढरपूरकरांवर आलेली आहे.  दोन्ही तालुक्यातील कामाचे अंदाजपत्रक देण्यासाठी वेळोवेळी संबंधित अधिकाऱ्याकडे पाठपुरावा करून देखील मंगळवेढा तालुक्यातील अंदाजपत्रक लवकर मिळाले व पंढरपूरचे लवकर मिळाले नाही त्यामुळे निधी मिळू शकला नाही यामुळे जिल्हाधिकारी यांनी तत्काळ कारवाई करावी अशी मागणी आ.आवताडे यांनी लेखी पत्राद्वारे केली आहे.त्यामुळे मस्तवाल अधिकाऱ्यांची मस्ती जिरवण्यासाठी व त्यांचा निषेध करण्यासाठी आमदार समाधान आवताडे यांनी आपल्या पदाचा राजीनामा द्यावा अशी मागणी राष्ट्रवादी युवक कॉंग्रेसचे प्रदेश सचिव श्रीकांत शिंदे यांनी केलेली आहे.

राष्ट्रवादीबद्दल कायम चर्चा असते की इथे फक्त गटातटाचे राजकारण चालते मात्र गटतट असते तरी तिथे कायम लोकशाही चालत असते. मात्र सध्या पंढरपूर -मंगळवेढा या ठिकाणी भाजपचे माजी आमदार प्रशांत परिचारक व आमदार समाधान आवताडे दोन मोठे नेते असताना ही अधिकारी जुमानत नसल्याने हा चर्चेचा विषय बनलेला आहे. कारण आ.समाधान आवताडे हे सरकारकडून निधी खेचून आणत असताना मंगळवेढा येथील मुख्याधिकारी प्रस्ताव सादर करीत आहेत त्यामुळे लगेच निधी मिळत असतो मात्र पंढरपूरचे मुख्याधिकारी हे नेमके प्रस्ताव सादर करण्यासाठी टाळाटाळ का करतात, का त्यांच्यावर कोणत्या नेत्याचा दबाव आहे. विशेष म्हणजे जर आ.आवताडे यांनी निधी आणला तर त्यांचे श्रेय त्यांना द्यावे लागेल आणि पंढरपुरात आवताडे गट स्टॉंग होईल या भितीनेच अधिकाऱ्यांना हाताशी धरून राजकारणाचा चुकीचा पायंडा तर पाडला जात नाही ना अशी शंका आता पंढरपूरातील जनतेला येत आहे. हे जनतेसमोर आले पाहिजे अशी भूमिका आता श्रीकांत शिंदे यांनी घेतलेली आहे.

पंढरपूर येथील यमाई – तुकाई तलाव सुशोभीकरणासाठी दोन कोटी आणि अनवली येथील गाव तलाव सुशोभीकरण साठी ५० लाख असे एकूण अडीच कोटीची मागणी करण्यात आली होती. या मागणी नुसार पर्यटन मंत्री यांनी पुढे कार्यवाही सुरु केली होती.यामध्ये जिल्हाधिकारी यांनी जिल्हा परिषद बांधकाम विभाग चे कार्यकारी अभियंता आणि पंढरपूर नगरपालिका मुख्याधिकारी यांना तात्काळ अंदाजपत्रक सादर करण्यासाठी सूचना दिली होती. मात्र वरील विभागाकडून वेळेत अंदाजपत्रक सादर न केल्याने पंढरपूर तालुक्यासाठी अडीच कोटींचा निधी मिळाला नाही.तो निधी परत गेलेला आहे. यासाठी जे अधिकारी जबाबदार असतील त्यांच्यावर कडक कारवाई करावी अशी मागणी आ. समाधान आवताडे यांनी जिल्हाधिकारी यांचेकडे तक्रार केली आहे. मात्र त्या अधिकाऱ्यांना अद्दल घडविण्यासाठी आमदार समाधान आवताडे यांनी आपल्या आमदारकीचा राजीनामा द्यावा अशी मागणी आता राष्ट्रवादीच्या श्रीकांत शिंदे यांनी केलेली आहे.

वास्तविक पाहता पंढरपूरातील अधिकारी हे आमदार महोदय यांना जुमानत नसतील तर सर्वसामान्यांबाबत काय करत असतील याचा विचारच न केलेला बरा अशी म्हणण्याची वेळ आला नागरिकांवर आलेली आहे.एखादा आमदार विरोधी पक्षामध्ये असल्यास आपण समजून घेवू शकतो मात्र आ.आवताडे हे सत्ताधारी भाजपचे आमदार असतानाही त्यांच्यावर ही वेळ येत असेल तर अशा अधिकाऱ्यांवर कारवाई झालीच पाहिजे जर कारवाई होणार नसेल तर आमदार आवताडे यांनी आपल्या पदाचा राजीनामा देवून त्याचा निषेध करावा अशी प्रतिक्रिया आता राष्ट्रवादीच्या श्रीकांत शिंदे यांनी दिलेली आहे.