पंढरपूर येथे रंगणार , पंढरपूर महोत्सव,२०२३ .

 

पंढरपूर (प्रतिनिधी) पुण्यभूमी, पवित्रनगरी पंढरीत अन्नपूर्णा पंढरपूर व लायन्स क्लब पंढरपूर ड्रीम यांच्या वतीने, पंढरपूर महोत्सव,२०२३ , चे आयोजन दि १४ एप्रिल ते १८ एप्रिल या कालावधीत कंडरेज रेसिडेन्सी, इसबावी पंढरपूर येथे करण्यात आले आहे, अशी माहिती सुप्रसिध्द उद्योजक श्री अजित कंडरे यांनी पत्रकार भवन येथे आयोजित करण्यात आलेल्या  पत्रकार परिषदेत दिली..

पंढरपूर व  आसपासच्या गावातील उद्योजकांना प्रोत्साहन व नवीन व्यवसायाला संधी मिळवून देण्याच्या उद्देशाने पंढरपूर महोत्सवाचे आयोजन करण्यात आले आहे. या महोत्सवातील आयोजक अन्नपूर्णा पंढरपूर यांच्या वतीने  कैलासवासी प्रल्हाद आबा कंडरे यांच्या स्मृतिप्रीत्यर्थ दीं ६ मे २०२२ पासून  पंढरपूर येथे अजित कंडरे आणि मित्रपरिवार यांनी अन्नपूर्णा पंढरपूर या योजनेचा प्रारंभ केला आहे.

दररोज भोजनाचे २५ मोफत डबे गरजू लोकांना घरपोच केले जात आहेत.या योजनेची कक्षा वाढविण्याचे प्रयत्न सुरू आहेत. लायन्स क्लब पंढरपूर ड्रीम या जागतिक पातळीवरील सेवाभावी संस्थेमार्फत डोळ्यांचे विकार असणाऱ्या गरीब,गरजू रुग्णांना मोफत वैद्यकीय उपचार, शस्त्रक्रिया करण्यासाठी  डोळ्यांचा दवाखाना सुरू करण्याचेही प्रयत्न सुरू आहेत.

त्यासाठी या महोत्सवातून  मिळणारा निधी वापरण्यात येणार आहे.या महोत्सवामध्ये विविध खाद्यपदार्थ  तसेच फॅशन ,दागिने,कपडे,खेळणी, संसारोपयोगी वस्तू, शैक्षणिक साहित्य, खेळाचे साहित्य यांचेही स्टॉल लावले जाणार आहेत. शेतीसाठी आवश्यक असणारी अवजारे, पशू आहार,रासायनिक व नैसर्गिक खते, यांचे स्टॉल्स उपलब्ध करण्यात आले आहेत.

इच्छुकांनी जास्तीत जास्त सहभाग नोंदवून हा महोत्सव यशस्वी करण्यासाठी साथ द्यावी, अशा भावना आयोजक पायल ( यलमार) कंडरे, स्वाती कंडरे - विभुते, ललिता कोळवले, अजित यलमार- कंडरे, गणेश पाटील, तानाजी सालविठ्ठल , जाकीर मुलाणी व सहकाऱ्यांनी केली आहे.