पंढरपूर मंगळवेढा विधानसभा निवडणूक चौरंगी होणार?

पंढरपूर (प्रतिनिधी)

पंढरपूर मंगळवेढा २५२ विधानसभा २०२४ ची निवडणुक चौरंगी होण्याची शक्यता नागरिकांमधून वर्तवली जात असल्याचे दिसुन येत आहे. दरम्यान अशा प्रकारचा सर्वे मतदारसंघातील नागरिकांमधून निर्भीड ने केला आहे. 

राज्य पातळीवरील बदलती राजकीय गणित पक्ष व नेते यांच्यातील बदलते वातावरण पहाता पंढरपूर मंगळवेढा मतदार संघातही विद्यमान आमदार समाधान आवताडे हे भारतीय जनता पार्टीकडून तर गत निवडणुकीत थोड्याफार फरकाने पराभूत झालेले भगिरथ भालके हे भारत राष्ट्र समिती या पक्षाकडूून निवडणूक रिंगणात उतरतील व सोलापूर जिल्हा विधानपरिषदेचे माजी आमदार प्रशांत परिचारक हे अपक्ष असे सामोरे जातील तर श्री.विठ्ठल सहकारी साखर कारखान्याचे चेअरमन अभिजीत पाटील हे राष्ट्रवादी काँग्रेस कडून पहिल्यांदाच विधानसभा निवडणूक लढवतील असा अंदाज नागरिकांमधून व्यक्त केला जात आहे. तसेच ही निवडणुक चौरंगी झाल्यास त्याचा परिचारक यांना अधिक फायदा होणार असल्याचेही बोलले जात आहे.

मागील पंढरपूर तालुक्यातील राजकारणाचा विचार केला तर परिचारक गट व विठ्ठल परिवार असा परस्पर विरोधी सामना होत होता यामध्ये परिचारक गट हा कायम सरस ठरला आहे कै सुधाकर परिचारक यांच्या निधनानंतर परिचारक गटाची पकड थोडी निसटताना जरी दिसत असली तरी सुद्धा बाजार समितीची निवडणूक व तालुक्यातील छोट्या-मोठ्या निवडणुकीत परिचारक गटाने तालुक्यातील आपले वर्चस्व टिकवून ठेवले आहे. तर दुसरीकडे विठ्ठल परिवारात प्रत्येक निवडणुकीत फूट पडून कै भारत भालके यांच्या निधनानंतर विठ्ठल परिवाराचा नेता कोण हेच तालुक्यातील जनतेला समजले नसल्याचे दिसते विठ्ठल परिवारातील दुसऱ्या फळीतील सर्वच नेते मंडळी आपापल्या कार्यकर्त्यांना सांभाळत आहेत तर आपणच विठ्ठल परिवाराचा नेता असल्याचे भासवून राजकारण करीत आहेत मात्र जनतेसमोर अजून भालकेनंतर विठ्ठल परिवाराचा नेता कोण हे समजल्याचे दिसत नाही. तर काही राजकीय पुढार्‍यांनी हीच संधी साधत विठ्ठल परिवाराच्या तव्यावर आपली पोळी भाजते का या प्रयत्नात पोस्टरबाजी सुरू केली आहे.  त्यामुळे पंढरपूर व मंगळवेढा तालुक्यातील मतांची गोळाबेरीज करताना चौरंगी लढत झाल्यास परिचारक गटाला मोठा फायदा होणार हे मात्र निश्चित.