पंढरपूर- ‘फार्मासिस्ट हे केवळ औषधतज्ञ नसून आरोग्यसेवा व्यवस्थेचे महत्त्वाचे आधारस्तंभ आहेत. ज्यांचे कार्य औषध देण्यापुरतेच मर्यादित नसून रुग्णांमध्ये आरोग्याविषयी जनजागृती करून योग्य मार्गदर्शन करणे हा आहे. औषधांचा योग्य वापर, आरोग्य शिक्षण व जनजागृती या माध्यमातून ते समाजाचे आरोग्य सुधारतात. जागतिक आरोग्याच्या गरजा पूर्ण करण्यात फार्मासिस्टचे योगदान अत्यंत महत्त्वाचे असून, त्यांचे समाजाच्या आरोग्यासंदर्भात असलेले काम हे प्रेरणादायी आहे.’ असे प्रतिपादन स्वेरीचे सचिव डॉ. सूरज रोंगे यांनी केले.
गोपाळपूर (ता. पंढरपूर) येथील श्री. विठ्ठल एज्युकेशन अँड रिसर्च इन्स्टिट्यूट संचलित कॉलेज ऑफ फार्मसी मध्ये ‘थिंक हेल्थ, थिंक फार्मासिस्ट’ या संकल्पनेतून ‘राष्ट्रीय फार्मासिस्ट दिवस-२०२५’ उत्साहात साजरा करण्यात आला. स्वेरीचे संस्थापक डॉ. बी. पी. रोंगे यांच्या मार्गदर्शनाखाली व प्राचार्य डॉ. मिथुन मणियार यांच्या नेतृत्वाखाली दि. २४ सप्टेंबर ते २६ सप्टेंबर २०२५ या कालावधीत याचे आयोजन केले होते. २४ सप्टेंबर रोजी ‘एन.एस एस. दिन’ निमित्त महाविद्यालयाच्या भव्य वाचनालयात ‘ऐच्छीक रक्तदान शिबिरा’चे आयोजन केले होते. वात्सल्य नेत्रालयाच्या नेत्ररोग तज्ज्ञ डॉ. राखी मणियार यांच्या हस्ते या शिबिराचे उदघाटन करण्यात आले. यावेळी त्यांनी डोळ्यांच्या आरोग्याबाबत माहिती दिली तसेच ‘दैनंदिन जीवनात डोळ्यांची काळजी कशी घ्यावी, योग्य आहार आणि जीवनशैलीद्वारे दृष्टी कशी निरोगी ठेवावी’ याबाबत मार्गदर्शन केले. अक्षय ब्लड बँकच्या सहकार्याने पार पडलेल्या या शिबिरात विद्यार्थी व प्राध्यापक असे मिळून एकूण ४३ रक्तदात्यांनी ऐच्छिक रक्तदान केले. फार्मासिस्टचे योगदान ओळखणे आणि त्यांच्या कार्यास प्रोत्साहन देणे यासाठी प्रत्येक वर्षी दि. २५ सप्टेंबर रोजी 'जागतिक फार्मासिस्ट दिवस' साजरा केला जातो. ‘जागतिक फार्मासिस्ट दिना’निमित्त सकाळच्या सत्रामध्ये स्वेरीज् कॉलेज ऑफ फार्मसी, पंढरपूर व पंढरपूर तालुका केमिस्ट अँड ड्रगिस्ट असोसिएशन यांच्या संयुक्त विद्यमाने आयोजिलेल्या ‘भव्य आरोग्य रॅली’चे उदघाटन स्वेरीचे सचिव डॉ. सूरज रोंगे यांच्या हस्ते करण्यात आले. या प्रसंगी पंढरपूर केमिस्ट अँड ड्रगिस्ट असोसिएशनचे अध्यक्ष प्रशांत खलिपे, सचिव महादेव जाधव, श्रीराम राहिरकर आणि माजी अध्यक्ष सतीश सादीगले यांनी मार्गदर्शन केले. प्राचार्य डॉ. मिथुन मणियार, एन.एस.एस. विभाग प्रमुख प्रा. हेमंत बनसोडे यांच्यासह शिक्षकवृंद, विद्यार्थी व तालुक्यातील फार्मासिस्ट मोठ्या संख्येने सहभागी झाले होते. यावेळी ‘थिंक हेल्थ, थिंक फार्मासिस्ट’ या विषयावर विद्यार्थ्यांनी लघुनाटिका सादर केली. दि.२६ सप्टेंबर रोजी ‘स्वस्थ नारी, सशक्त परिवार’ या उपक्रमांतर्गत ‘आरोग्य तपासणी शिबिर’ घेण्यात आले. यात सीबीसी, थायरॉईड, लिव्हर, किडनी, बीएसएल रँडम, एचबीएएलसी यांसह विविध तपासण्या करण्यात आल्या. याचे उदघाटन स्त्रीरोगतज्ज्ञ डॉ. स्नेहा रोंगे, डॉ. आशुतोष शेळके व डॉ. वैष्णवी खुर्द यांच्या हस्ते झाले. ‘फार्मासिस्ट दिना’निमित्त मेहंदी, रेखाटन, बुद्धिबळ, कॅरम व रील मेकिंग अशा विविध स्पर्धांचे आयोजन करण्यात आले. ‘थिंक हेल्थ, थिंक फार्मासिस्ट’ या संकल्पनेवर आधारित या ‘सर्जनशील’ स्पर्धांमध्ये विद्यार्थ्यांनी उत्स्फूर्त सहभाग घेतला. तसेच कॉलेज मध्ये विद्यार्थ्यांसाठी मेडिकल डिटेलिंग, फार्मस्यूटीकल मॉडेल प्रेझेंटेशन, पॉवर पॉईंट प्रेझेंटेशन, ऍनिमेशन व्हिडिओ स्पर्धा, पोस्टर प्रेझेंटेशन, प्रश्नमंजुषा, वादविवाद स्पर्धा, रांगोळी आणि मेहंदी अशा विविध स्पर्धां तर क्रीडाप्रकारांमध्ये कॅरम आणि बुद्धिबळ या स्पर्धा देखील घेण्यात आल्या. याप्रसंगी प्राचार्य डॉ. एम. जी. मणियार म्हणाले की, ‘यंदाची थीम 'थिंक हेल्थ, थिंक फार्मासिस्ट’ ही फार्मासिस्टच्या समाजातील भूमिकेचे प्रतीक आहे. आरोग्य आणि फार्मासिस्ट हे समाजाचे अविभाज्य घटक आहेत. योग्य औषधोपचार, आरोग्यजागृती आणि वैज्ञानिक दृष्टिकोनातून फार्मासिस्ट समाजाच्या आरोग्यवर्धनात महत्त्वाची भूमिका बजावतो. ही संकल्पना आजच्या आरोग्यसेवेचा खरा पाया आहे.’ असे सांगून औषधनिर्माण क्षेत्रातील अनुभव सांगितले. जागतिक फार्मासिस्ट दिनानिमित्ताने प्रमुख पाहुणे केंद्र शासनातील वरिष्ठ रेल्वे फार्मासिस्ट किरण कदम यांनी ‘विद्यार्थ्यांना फार्मसी क्षेत्रातील विविध शासकीय परीक्षांची तयारी कशी करावी, येणाऱ्या अडचणी व त्यांचे नियोजन, याबद्दल महत्वपूर्ण माहिती देवून स्वेरीच्या आदर युक्त शिस्तीचे कौतुक केले. राष्ट्रीय फार्मसी सप्ताह अंतर्गत घेण्यात आलेल्या स्पर्धांच्या विजेत्या आणि उपविजेत्या स्पर्धकांना प्रमुख पाहुण्यांच्या हस्ते बक्षीस वितरण करण्यात आले. या कार्यक्रमाप्रसंगी सांस्कृतिक कार्यक्रमाचे विभागप्रमुख प्रा. सुप्रज्ञा गायकवाड यांच्यासह इतर प्राध्यापक उपस्थित होते. यावेळी विविध कार्यक्रमांचे सूत्रसंचालन विद्यार्थिनी गायत्री कापसे, लक्ष्मी दबडे, सानिका बाबर, स्वप्नाली घाडगे व दीक्षा झांबरे यांनी केले तर सुयश भोसले यांनी आभार मानले.
0 Comments