🛑 *वन्यप्राण्यांपासून शेतकऱ्यांच्या पिकांच्या संरक्षणासाठी खासदार प्रणिती शिंदे यांचा पुढाकार; सीएसआर फंडातून अल्पभूधारक शेतकऱ्यांना झटका मशीनचे वाटप*

उत्तर सोलापूर तालुक्यातील वन्यप्राण्यांच्या वाढत्या उपद्रवामुळे शेतकऱ्यांच्या पिकांचे मोठ्या प्रमाणात नुकसान होत आहे. विशेषतः नान्नज अभयारण्य परिसरातील गावांमध्ये शेतकऱ्यांना या समस्येचा सातत्याने सामना करावा लागत आहे. या पार्श्वभूमीवर शेतकऱ्यांच्या पिकांचे संरक्षण व्हावे आणि त्यांचे आर्थिक नुकसान टाळता यावे, या उद्देशाने खासदार प्रणिती शिंदे यांच्या पुढाकारातून सीएसआर निधीच्या माध्यमातून गरीब व गरजू अल्पभूधारक शेतकऱ्यांना मोफत झटका मशीनचे वाटप करण्यात आले.

गुळवंची येथे आयोजित कार्यक्रमात नान्नज, कोंडी, बाणेगाव, मार्डी आणि कारंबा या गावांतील अल्पभूधारक शेतकऱ्यांना खासदार प्रणिती शिंदे यांच्या हस्ते झटका मशीनचे वितरण करण्यात आले. यामध्ये नान्नज येथील संतोष चोपडे, कोंडी येथील सदाशिव भोसले, बाणेगाव येथील हनुमंत लक्ष्मण आतकरे, मार्डी येथील भगवान नामदेव कदम आणि कारंबा येथील लक्ष्मण माने या शेतकऱ्यांचा समावेश होता.

यावेळी बोलताना खासदार प्रणिती शिंदे यांनी सांगितले की, श्यामाप्रसाद योजनेअंतर्गत उत्तर सोलापूर तालुक्यातील शेतकऱ्यांना वन्यप्राण्यांपासून पिकांचे संरक्षण करण्यासाठी झटका मशीन उपलब्ध करून देण्याबाबत केंद्र सरकारकडे प्रस्ताव सादर करण्यात आले आहेत. मात्र हे प्रस्ताव अद्याप प्रलंबित आहेत. शासनाकडून आवश्यक यंत्रणा उपलब्ध होण्यास विलंब होत असल्याने शेतकऱ्यांची अडचण लक्षात घेऊन प्राथमिक स्वरूपात सीएसआर फंडातून झटका मशीन खरेदी करून त्यांचे वाटप करण्यात येत आहे. तसेच वन्यप्राण्यांमुळे शेतीचे होणारे नुकसान हा गंभीर प्रश्न असून याबाबत संसदेत आवाज उठवून शेतकऱ्यांना झटका मशीन आणि इतर आवश्यक संरक्षणात्मक सुविधा, नुकसान भरपाई तातडीने उपलब्ध करून देण्यासाठी प्रयत्नशील राहणार असल्याचेही त्यांनी स्पष्ट केले. या झटका मशीनमुळे जंगली प्राण्यांपासून शेतकऱ्यांच्या पिकांचे संरक्षण होण्यास मदत होणार असून पिकांचे नुकसान कमी करून शेतकऱ्यांचे आर्थिक हित जपले जाणार आहे. शेतीची सुरक्षितता वाढविण्यासाठी आणि शेतकऱ्यांच्या मेहनतीने उभ्या केलेल्या पिकांचे रक्षण करण्यासाठी हा उपक्रम महत्त्वपूर्ण ठरणार असल्याचे मत यावेळी व्यक्त करण्यात आले.

याप्रसंगी उत्तर सोलापूर तालुका काँग्रेसचे अध्यक्ष भारत जाधव, जिल्हा समन्वयक मनोज एल्गुलवार, संजय पोळ, सचिन गुंड, शुभम शिराळ, विनायक भोसले, अमोल पांढरे, राजू शिंदे, सोमनाथ भोसले, सागर राठोड, मनोरंजन जाधव यांच्यासह शेतकरी मोठ्या संख्येने उपस्थित होते.

▬▬▬ஜ۩(tp)۩ஜ▬▬▬