पंढरपूर (प्रतिनिधी) : काल ९ ऑगस्ट रोजी जागतिक आदिवासी दिन होता. या दिवशी भारतासह संपुर्ण जगात आदिवासी दिन साजरा केला जातो. महर्षी वाल्मिकी संघाचे वतीने आम्हीही पंढरपुरात दरवर्षी तो साजरा करतो परंतु पंढरपूर नगरपरिषद प्रशासन यासाठी कोणतंही सहकार्य करत नाही. आम्ही काही दिवसांपूर्वी पंढरपूर नगरपरिषद प्रशासनाकडे पंढरपूर येथील आद्यक्रांतीकारक राघोजी भांगरे चौक, महर्षी वाल्मिकी भवन व चंद्रभागेच्या पात्रातील आद्यक्रांतीकारक राघोजी भांगरे यांच्या स्मारकाच्या जागेवर अशा तीन ठिकाणी मंडप स्पीकर उपलब्ध करून देण्याची मागणी केली होती, परंतु काल आदिवासी दिनादिवशी पंढरपूर नगरपरिषद प्रशासनाकडून कोणतीही व्यवस्था केली नाही. त्यामुळे विविध जाती, धर्मातील महापुरुषांचे जयंती, पुण्यतिथी साठी आवश्यक त्या सर्व सुविधा पुरवणारे पंढरपूर नगरपरिषद प्रशासन व अधिकारी हे जातीयवादी आहे हे सिद्ध झाले असुन त्यांचा आम्ही जाहीर निषेध करतो असे मत महर्षी वाल्मिकी संघाचे संस्थापक अध्यक्ष गणेश अंकुशराव यांनी एका प्रसिध्दी पत्रकाद्वारे व्यक्त केले आहे.
जगातील विविध देशात साधारणपणे जंगलामध्ये वास्तव्य करणाऱ्या मूळ निवासी समुहांनी पर्यावरण जपण्याचे मोलाचे कार्य केले. परंतु समाजाच्या मुख्य प्रवाहात नसल्याने या आदिम जमाती शिक्षण, आरोग्य, रोजगार या सर्वांपासून कोसो दूर राहिल्या होत्या. या मूळ निवासी आदिम जमातींचे अस्तित्व मान्य करण्यासाठी संयुक्त राष्ट्र संघाने 9 ऑगस्ट 1994 या दिवशी विश्व आदिवासी दिवस घोषित केला. त्यावेळेपासून दरवर्षी या दिवसाच्या निमित्ताने आदिवासी जमातींच्या मुलभूत सुविधा पुरविण्याकडे लक्ष वेधणे व त्या मिळवून देणे याला सुरुवात झाली. व या दिवशी आदिवासी जमात बांधव जागतिक आदिवासी दिन साजरा करतात. पंढरपूर शहरातील दोन प्रभागात आदिवासी कोळी जमातीचे असंख्य समाजबांधव मोठ्या संख्येने वास्तव्यास आहेत. परंतु पंढरपूर नगरपरिषद प्रशासन या जमातीच्या सुख दु:खात विविध सोयीसुविधा देण्यासाठी कुचराई करत आहे.
काल आम्ही आदिवासी दिन साजरा केला, परंतु पंढरपूर नगरपरिषद प्रशासनातील अधिकारी यांनी आम्हाला हा उत्सव साजरा करण्यासाठी कसलेही सहकार्य केले नाही, जाणुनबुजून आमच्या समाजाकडं दुर्लक्ष करणाऱ्या नगरपरिषद प्रशासन आणि आमच्या समाजाचा फक्त मतांसाठी वापर करुन घेत असलेल्या राजकीय नेत्यांचा आम्ही जाहीर निषेध करतो अशा तीव्र शब्दात गणेश अंकुशराव यांनी आपली भुमिका स्पष्ट केली आहे.
0 Comments