श्री विठ्ठलाचे सेवाधारी, पंढरपूरच्या अध्यात्मिक क्षेत्रातील एक व्यासंगी, अभ्यासू अधिकारी व्यक्तिमत्व, याज्ञवल्क्य संस्थेचे ज्येष्ठ सदस्य, प्रवचनकार, कीर्तनकार, सा. पंढरी संदेश, गार्गी मासिक अशा अनेक वृत्तपत्रातून अध्यात्मिक, संतसाहित्यावर प्रभावी लिखाण करणारे एक वंदनीय श्रद्धेय ह. भ. प. श्री. बाळशास्त्री हरिदास तथा बाबा यांचं वृद्धापकाळानं वयाच्या 92 व्या वर्षी दुःखद निधन झालं.
जगद्गुरू तुकोबाराय म्हणतात...
"नरदेहा यावें हरिदास व्हावें । तेणें चुकवावें जन्मममरण ll
तुका म्हणे मुखीं नित्य म्हणे हरि । तया सुखा सरी नाहीं पार ॥"
गेले काही दिवसच वै. बाबा अंथरुणावर खिळून होते. त्याआधी मात्र... "हरीदासीयाचे घरी l मज उपजवा जन्मानंतर" या अभंगप्रमाणे हरिदास परिवारात जन्मण्याचं भाग्य मिळालेले वै. बाबा... आपल्या नेमस्त आचरणात व्यग्र असायचे. स्नान, संध्या, देवपूजा, अखंड ग्रंथांचे वाचन अभ्यास, लिखाण, नगरप्रदक्षिणा या आपल्या दिनचर्येत व्यस्त असायचे. वयोमानानुसार अनेक दिवसांपासून त्यांची दृष्टी खूप अधू झाली होती पण त्यांच्या दिनचर्येत कोठेही बदल नव्हता. काठी टेकत का होईना ते कौटुंबिक, सांप्रदायिक अनेक कार्यक्रमांना आवर्जून हजर असायचे, व्यासपीठावरून मार्गदर्शन करायचे. वै. बाबा म्हणजे ज्ञानाचा वटवृक्ष होता... ज्याच्या सावलीखाली अनेक अभ्यासू पांथस्थ निवारा घेऊन गेले. आज तो वटवृक्ष उन्मळून पडला. त्यांचे अनेक वृत्तपत्रातून प्रसिद्ध झालेले संत साहित्य पुस्तकरुपात प्रसिद्ध करायचे म्हटले तर अनेक खंड होतील.
वै. बाळशास्त्री हरिदास यांच्या निधनामुळे पंढरपूरच्याच नव्हे तर एकूणच सांप्रदायात एक पोकळी निर्माण झाली. उमेदीच्या काळात वै. बाबांचा राजकीय, सामाजिक, शैक्षणिक अनेक क्षेत्रात वावर होता. अनेकांचे मार्गदर्शक, सल्लागार असणारे वै. बाबा... नगरवाचन मंदिर, आपटे उपलप प्रशाला अशा शतकोत्तर नामांकित संस्थांवर विश्वस्त म्हणून कार्यरत होते.
सध्याच्या चातुर्मासातील पर्वकाळात त्यांचं परमेश्वर चरणी विलीन होणं हीच त्यांची खरी पुण्याई..! वै. बाबांच्या पवित्र स्मृतीस विनम्र अभिवादन व केसकर कुटुंबियांकडून भावपूर्ण श्रद्धांजली 💐🙏🙏
त्यांची अंत्ययात्रा हरिदास वेस येथील त्यांचे रहाते घरापासून दि. 9 ऑगस्ट रोजी उद्या सकाळी 9 वाजता निघेल.
मंदार केसकर
0 Comments