फुले दाम्पत्यांनी महिलांच्या न्याय व शिक्षणासाठी संघर्ष केला -विभागप्रमुख डॉ. यशपाल खेडकरस्वेरीत महात्मा फुले यांची १९८ वी जयंती साजरी

पंढरपूर- ‘समाजातील महिलांची प्रगती व्हावी यासाठी महात्मा जोतिराव फुले यांनी स्त्रीशिक्षणाची सुरवात घरापासून केली. त्यांनी प्रथम सावित्रीबाईंना शिक्षित केले. पुढे फुले दाम्पत्यांनी महिलांच्या शिक्षणासाठी पहिली शाळा भिडे वाड्यामधून सुरु केली. तेथून महिलांच्या शिक्षणासाठी अविरत कार्य चालू राहिले. समाज व्यवस्थेमध्ये विधवा महिलांवर अन्याय अत्याचार होत होते. त्यांचे पुनर्वसन करण्यासाठी फुले दाम्पत्यांनी संघर्षात्मक कार्य केले.’ असे प्रतिपादन स्वेरीज् कॉलेज ऑफ इंजिनिअरींगच्या प्रथम वर्ष अभियांत्रिकीचे विभागप्रमुख डॉ. यशपाल खेडकर यांनी केले. 

        स्वेरीचे संस्थापक सचिव व कॉलेज ऑफ इंजिनिअरींगचे प्राचार्य डॉ.बी.पी.रोंगे यांच्या मार्गदर्शनाखाली गोपाळपूर (ता. पंढरपूर) येथील श्री.विठ्ठल एज्युकेशन अँड रिसर्च इन्स्टिट्यूट संचलित कॉलेज ऑफ इंजिनिअरींग (ऑटोनॉमस) मध्ये थोर समाज सुधारक, स्त्री शिक्षणाचे प्रेरक आणि जनक महात्मा जोतिराव फुले यांच्या १९८ वी जयंती साजरी करण्यात आली. याप्रसंगी डॉ. खेडकर हे मार्गदर्शन करत होते. सुरवातीला उपप्राचार्या डॉ. मिनाक्षी पवार यांच्या हस्ते महात्मा जोतीराव फुले यांच्या प्रतिमेचे पूजन करण्यात आले. महात्मा फुले यांचा जीवनपट उलगडून दाखवताना डॉ. खेडकर पुढे म्हणाले की, ‘थोर समाजसुधारक महात्मा फुले यांचे शिक्षण व सामाजिक क्षेत्रात अनमोल योगदान असून त्यांच्या सामाजिक व शैक्षणिक कार्यातून सर्वांना स्फूर्ती मिळते. महाराष्ट्रातील एक सामाजिक कार्यकर्ते, विचारवंत, समाजसुधारक आणि लेखक म्हणून आपण त्यांच्याकडे पाहतो. सामाजिक प्रबोधन, अस्पृश्यता व जातीव्यवस्थेचे निर्मूलन तसेच स्त्रियांना व समाजातील मागास घटकांना शिक्षण देण्याचे महान कार्य त्यांनी अखंडपणे केले. तत्कालीन समाजातील जातिभेद, अनिष्ट प्रथा, तसेच समाजातील प्रस्थापितांची मक्तेदारी याविरुद्धची प्रतिक्रिया महात्मा फुले यांच्या साहित्यातून उमटलेली दिसून येते. त्याकाळच्या समाजाला प्रबोधनाची व सामाजिक परिवर्तनाची वाट दाखविण्यासाठी त्यांनी लिहिलेले ग्रंथ हे मार्गदर्शक व प्रेरणादायी ठरतात. समताधिष्ठित समाजाच्या निर्मितीमध्ये महात्मा फुले यांनी मोलाचे योगदान दिलेले आहे. त्यांचे कार्य समाजाला प्रेरणादायी आहे. त्यांच्या सामाजिक योगदानामुळेच आज समाजात स्त्री व पुरुष खांद्याला खांदा लावून कार्य करत आहेत.’ असे सांगितले. यावेळी शैक्षणिक अधिष्ठाता डॉ. एम.पी.ठाकरे, प्रशासन अधिष्ठाता डॉ.आर.आर. गिड्डे, संशोधन विभागाचे अधिष्ठाता डॉ. ए.पी. केने, मेकॅनिकल इंजिनिअरिंगचे विभागप्रमुख डॉ. एस.बी. भोसले, इलेक्ट्रिकल इंजिनिअरिंगचे विभागप्रमुख डॉ. बादलकुमार, एम.बी.ए. विभागाचे प्रमुख डॉ. के.पी. गलानी, प्रा. संदीपराज साळुंखे, प्रा. ए.बी. कोकरे, रजिस्ट्रार राजेंद्र झरकर, मिलिंद कोकणे, सोमनाथ नाईकनवरे, अमोल चंदनशिवे, बाळासाहेब नाईकनवरे, प्राध्यापक वर्ग, शिक्षकेतर कर्मचारी व विद्यार्थी उपस्थित होते.