पंढरपुरात कारसह १२ किलोचा गांजा जप्तपंढरपूर शहर पोलिसांची कारवाई

पंढरपूर(प्रतिनिधी):- अवैधरित्या विक्रीसाठी आणलेला सुमारे २ लाख ४५ हजार रूपये किंमतीचा एकूण १२.२७२ किलोचा गांजा आणि ८ लाख रूपये किंमतीची इर्टिगा कार असा दहा लाख ४५ हजार ४४० रूपयांचा मुद्देमाल शहर पोलिसांच्या पथकाने जप्त केला. याप्रकरणी पुणे जिल्ह्यातील दोन आरोपींना अटक करण्यात आली. रात्री सव्वादहा

वाजण्याच्या सुमारास येथील जुना अकलूज रोडवर ही कारवाई करण्यात आली.

रोहन शंकर चव्हाण (वय २१) व रोहीत प्रकाश कांबळे (वय २५, दोघे रा. बावडा, ता. इंदापूर, जि. पुणे) अशी पोलिसांनी अटक केलेल्या दोघांची नावे आहेत. शहर पोलीस निरीक्षक विश्वजीत घोडके यांच्या मार्गदर्शनाखाली गुन्हे प्रकटीकरण शाखेचे

सहाय्यक पोलीस निरीक्षक आशिष कांबळे, पोलीस उपनिरीक्षक राजेश गोसावी, सहा. फौजदारा शरद कदम, हवालदार हैंबाडे, गोडसे, औटी, निलेश कांबळे, मंडले, माने, बिचुकले यांचे पथक पंढरपूर शहर परिसरात रात्रीची गस्त घालत होते. यादरम्यान, जुना अकलूज रोडवर डी-मार्टकडे जाणाऱ्या रस्त्यावर अंधारात संशयास्पदरित्या एक इर्टिगा कार (एम.एच. ०७ / एस.३६९९) थांबलेली पोलिसांना दिसली. पोलिसांचा सुगावा लागताच या कारमधून रोहन चव्हाण व रोहीत कांबळे हे दोघे पळून जाऊ लागले. मात्र, पोलिसांनी पाठलाग करून दोघांना ताब्यात घेतले.

पोलिसांनी तपासणी केली असता कारमध्ये खाकी कागदात गुंडाळून चिकटपट्टी लावलेले गांजाचे ६ बॉक्स दिसून आले. दोन लाख ४५ हजार ४४० रूपये किंमतीचा हा १२.२७२ किलोचा गांजा आणि ८ लाख रूपये किंमतीची कार पोलिसांनी जप्त केली. तसेच कारमधील दोघांना अटक करण्यात यश आले. सदर आरोपींना येथील न्यायालयात हजर करण्यात आले. आरोपींनी गांजा कोठून आणला? गुन्ह्यात आणखी कोणाचा सहभाग आहे? याबाबींचा तपास करावयाचा असल्याने आरोपींना पोलीस कोठडी द्यावी, अशी विनंती पोलिसांनी यावेळी न्यायालयाला केली. न्यायालयाने दोघांनाही १७ फेब्रुवारीपर्यंत पोलीस कोठडी ठोठावली. अधिक तपास पोलीस उपनिरीक्षक गोसावी हे करीत आहेत.