सुमारे २५ कंपन्या आणि १५०० पेक्षा जास्त पदवीधरांचा सहभाग
पंढरपूर- गोपाळपूर (ता.पंढरपूर) येथील स्वेरी संचलित कॉलेज ऑफ इंजिनिअरिंग (ऑटोनॉमस) आणि 'अनुदीप फाउंडेशन' यांच्या संयुक्त विद्यमाने स्वेरीचे संस्थापक व कॉलेज ऑफ इंजिनिअरिंगचे प्राचार्य डॉ. बी. पी. रोंगे यांच्या मार्गदर्शनाखाली स्वेरीमध्ये आज दि.२८ नोव्हेंबर आणि उद्या दि. २९ नोव्हेंबर २०२५ रोजी 'मेगापोल कॅम्पस ड्राईव्ह'चे आयोजन करण्यात आले आहे. आज रोजी पंढरपूर पोलीस स्टेशनचे उपविभागीय पोलीस अधिकारी मा. प्रशांत डगळे, अनुदीप फौंडेशनचे विभागीय व्यवस्थापक नरेंद्र मौर्य तसेच पु.अ.हो. सोलापूर विद्यापीठ सोलापूरच्या सायन्स अँड टेक्नोलॉजी विभागाचे अधिष्ठाता डॉ. प्रशांत पवार या मान्यवरांच्या शुभहस्ते व विविध कंपन्यांच्या मानव संसाधन अधिकाऱ्यांच्या उपस्थितीत दीप प्रज्वलन करून उद्घाटन करण्यात आले.
या उद्घाटन समारंभाच्या सुरुवातीला अनुदीप फौंडेशनच्या मा.वाहबीझ यांनी अनुदीप फौंडेशनच्या कार्याबद्दल सर्वांना माहिती दिली. त्यानंतर कार्यक्रमाचे प्रमुख पाहुणे व अध्यक्ष तसेच विविध कंपन्यांचे मानव संसाधन अधिकारी यांचे स्वागतपर सत्कार करण्यात आले तसेच अनुदीप फौंडेशनच्या वतीने स्वेरीचे प्रतिनिधी म्हणून स्वेरीज कॉलेज ऑफ इंजिनिअरींगच्या उपप्राचार्या डॉ. मिनाक्षी पवार यांचा सत्कार करण्यात आला.
कार्यक्रमाचे प्रमुख पाहुणे व पु.अ.हो. सोलापूर विद्यापीठ सोलापूरच्या सायन्स अँड टेक्नोलॉजी विभागाचे अधिष्ठाता डॉ. प्रशांत पवार हे उपस्थित विद्यार्थ्यांना मार्गदर्शन करताना म्हणाले कि, ‘विद्यार्थ्यांनी यशस्वी होण्यासाठी शरीर आणि मन या दोन गोष्टींवर नियंत्रण मिळवले पाहिजे तसेच आपले ज्ञान, कौशल्ये आणि दृष्टीकोन या तीन महत्वाच्या बाबींवर लक्ष केंद्रित केले पाहिजे.’ या उद्घाटनाच्या कार्यक्रमाचे अध्यक्ष म्हणून पंढरपूर पोलीस स्टेशनचे उपविभागीय पोलीस अधिकारी मा. प्रशांत डगळे हे विद्यार्थ्यांना मार्गदर्शन करताना म्हणाले कि, ‘जीवनात यशस्वी होण्यासाठी विद्यार्थ्यांनी ‘प्रेरणा’ आणि ‘शिस्त’ या दोन गोष्टींमधला फरक जाणून घेणे गरजेचे आहे. विद्यार्थ्यांनी न ससा बनायचे आहे न कासव तर त्यांनी ससा आणि कासव यांच्या मधील दोन्ही गुणांचा अवलंब करायचा आहे. शिस्त हि आपली सवय असली पाहिजे तसेच मनाच्या विरुद्ध जाऊन कार्य करण्यासाठी आपल्याकडे शिस्त असणे फार गरजेचे आहे.’
स्वेरीमध्ये आयोजित या पूल कॅम्पसमध्ये जवळपास २५ हुन अधिक कंपन्या सहभागी झाल्या आहेत. या कॅम्पस ड्राईव्हच्या माध्यमातून विद्यार्थ्यांना कोअर आयटी, मॅनेजमेंट, बँकिंग तसेच इतर संबंधित क्षेत्रात विविध नोकरींच्या संधी उपलब्ध होणार आहेत. या पूल कॅम्पस ड्राईव्हसाठी सोलापूर जिल्ह्यातील विविध महाविद्यालयांतील पंधराशे पेक्षा जास्त विद्यार्थ्यांनी नोंद केली आहे. सदर पुल कॅम्पस ड्राईव्ह शुक्रवार दि. २८ आणि शनिवार दि. २९ हे दोन दिवस चालणार आहे. अनुदीप फाउंडेशन सोबत 'आयबीएम' या जगविख्यात कंपनीचे देखील सहाय्य मिळत आहे. या कंपनीच्या सोशल रिस्पॉन्सिलिटीच्या माध्यमातून ही संधी ग्रामीण भागातील विद्यार्थ्यांसाठी उपलब्ध केली जात आहे. यासाठी नरेंद्र मौर्य, अमित दास, राहील शेख आणि अनुदीपची टीम स्वेरीत कार्यरत आहे. संस्थेचे संस्थापक व कॉलेज ऑफ इंजिनिअरिंगचे प्राचार्य डॉ. बी. पी. रोंगे यांच्या मार्गदर्शनाखाली, कॅम्पस इन्चार्ज डॉ. एम.एम. पवार यांच्या सहकार्याने, उपप्राचार्या डॉ. मिनाक्षी पवार यांच्या नेतृत्वाखाली ट्रेनिंग अँड प्लेसमेंट विभागाचे अधिष्ठाता डॉ. करण पाटील, डॉ. एस.एम. खोमणे व त्यांचे सहकारी हे या पूल कॅम्पसच्या यशस्वीतेसाठी प्रयत्नशील आहेत. सदर कार्यक्रमाचे सूत्रसंचालन डॉ. यशपाल खेडकर यांनी केले तर अनुदीप फौंडेशनच्या मा. वाहबीझ यांनी सर्वांचे आभार मानले.
0 Comments