पंढरपूर– गोपाळपूर (ता. पंढरपूर) येथील श्री विठ्ठल एज्युकेशन अँड रिसर्च इन्स्टिट्यूट संचलित कॉलेज ऑफ इंजिनिअरींग मधील विद्यार्थी व प्राध्यापक प्रतिनिधी मंडळ यांचा मलेशियातील इंटी (आयएनटीआय) विद्यापीठ येथे तीन आठवड्यांचा शैक्षणिक अध्ययन दौरा नुकताच पार पडला. हा अभ्यास दौरा संस्थेच्या जागतिक संबंधांना अधिक दृढ करण्याच्या दिशेने एक महत्त्वपूर्ण पाऊल ठरला आहे.
इंटी विद्यापीठ हे १९८६ मध्ये स्थापन झाले असून मलेशियातील सर्वात जुन्या विद्यापीठांपैकी एक आहे. या विद्यापीठाने क्यु. एस. वर्ल्ड युनिव्हर्सिटी रँकिंग २०२६ मध्ये ५०९ वा क्रमांक मिळविला आहे. ग्रामीण भागातील विद्यार्थ्यांना जागतिक स्तरावर शिकण्याची, प्रगत तंत्रज्ञानाची आणि करिअरच्या संधींची थेट ओळख व्हावी यासाठी संस्थेचे संस्थापक व कॉलेज ऑफ इंजिनिअरिंगचे प्राचार्य डॉ. बी.पी. रोंगे यांच्या मार्गदर्शनाखाली, स्वेरीचे कॅम्पस इन्चार्ज डॉ. एम.एम. पवार यांच्या सहकार्याने, उपप्राचार्या डॉ. मिनाक्षी पवार व ट्रेनिंग अँड प्लेसमेंट विभागाच्या नेतृत्वाखाली हा अभ्यास दौरा आयोजित करण्यात आला होता. या दौऱ्याची ठळक वैशिष्ट्ये म्हणजे अत्याधुनिक तंत्रज्ञान व सध्याच्या व्यावसायिक जगतातील प्रवाहांची माहिती मिळविणे, आंतरराष्ट्रीय स्तरावर संबंध प्रस्थापित करण्याची संधी, विद्यार्थ्यांना जागतिक पातळीवर करिअर घडविण्यासाठी आवश्यक मार्गदर्शन ही आहेत. यामुळे विद्यार्थ्यांच्या सर्वांगीण विकासासाठी आणि आंतरराष्ट्रीय शिक्षणक्षेत्राशी निगडित नवीन दालने खुली होत आहेत. या दौऱ्यात कार्यशाळा आणि प्रकल्पाधारित शिक्षण या बाबींवर मुख्य भर देण्यात आला होता. कृत्रिम बुद्धिमत्ता (एआय) या विषयावर डॉ. एम. झियाद यांच्या मार्गदर्शनाखाली आयोजिलेल्या कार्यशाळेत विद्यार्थ्यांना ‘एआय टूल्स, मशिन लर्नींग आणि डेटा एनॅलिसीस’ या संदर्भात प्रशिक्षण देण्यात आले. या दरम्यान विद्यार्थ्यांना इमेज रेक्गनायझेशन, ऑब्जेक्ट डीटेक्शन, टेक्स्ट समरायझेशन, एआय बेस्ड प्रेडिक्शन मॉडेल्स यांसारख्या अत्याधुनिक विषयांची सखोल माहिती देण्यात आली. विद्यार्थ्यांनी एआय वापरून वास्तव जीवनातील समस्या सोडवणारे प्रकल्प तयार केले, जसे की स्मार्ट सिस्टीम्स, ऑटोमेशन साधने आणि एआय - आधारित सोल्यूशन्स या मार्गदर्शनामुळे विद्यार्थ्यांना तांत्रिक कौशल्या सोबतच नवनिर्मितीची प्रेरणा मिळाली. त्याचबरोबर विद्यार्थ्यांनी पायथॉन आधारित लायब्ररी वापरून डेटा क्लिनिंग, मॉडेल ट्रेनींग आणि मॉडेल अॅक्युरसी टेस्टींग यांसारखी कौशल्ये आत्मसात केली. त्यानंतर संगीत आणि स्थानिक भाषेच्या शिकवणींचा अनुभव विद्यार्थ्यांनी घेतला. त्यासाठी इंटी विद्यापीठाने विद्यार्थ्यांसाठी ट्रॅडीशनल म्युझीक लर्नींगचे आयोजन केले होते. यामध्ये विद्यार्थ्यांना मलेशियाच्या गेमलन, अंग्कलुंग वादन आणि स्थानिक लोकसंगीत अशा पारंपरिक संगीत शैलींबद्दल मार्गदर्शन केले गेले. विद्यार्थ्यांनी प्रात्यक्षिकात संगीताच्या तालावर भारतीय शास्त्रीय संगीताचे सूर मिसळून एक अनोखा सांस्कृतिक संगम तयार केला. त्याचबरोबर स्थानिक मल्य भाषेची ओळख करून घेतली. त्यातुन स्थानिक संवाद कौशल्ये, उच्चार व सांस्कृतिक अभिव्यक्ती यांचा लाभ घेतला. यामुळे विद्यार्थ्यांचा आत्मविश्वास अधिक वाढला. त्यामुळे स्थानिक विद्यार्थ्यांशी अधिक प्रभावी संवाद साधता आला. फिजिओथेरपी आणि आरोग्य याविषयी सुद्धा त्यांना प्रशिक्षण देण्यात आले. यामध्ये स्थानिक प्रशिक्षकांनी विद्यार्थ्यांना मानवी शरीराची स्थिती, व्यायामाची योग्य पद्धत, स्नायूंचे आरोग्य राखण्याचे मार्ग तसेच तणाव व्यवस्थापन आणि फिटनेसचे तत्त्वज्ञान दिल्यामुळे विद्यार्थ्यांना शारीरिक व मानसिक आरोग्याचे महत्त्व उमगले. त्यानंतर संशोधन व विकास यावर देखील भर देण्यात आला. त्यातून विद्यार्थ्यांना नवनवीन संशोधन प्रकल्पांची माहिती मिळाली. प्रयोगशाळेतील अत्याधुनिक उपकरणांचा वापर, डेटा संकलन पद्धती, संशोधन लेखन आणि प्रेझेंटेशन तंत्रज्ञान यांचे देखील विद्यार्थ्यांना प्रशिक्षण देण्यात आले. विद्यार्थ्यांना आंतरराष्ट्रीय संशोधन पद्धती आणि जागतिक मानकांचे प्रत्यक्ष ज्ञान मिळाले. यानंतर आंतरराष्ट्रीय अनुभव, ज्ञान, संस्कृती आणि आत्मविश्वासाचा संगम साधताना विद्यार्थ्यांना केवळ शैक्षणिक नव्हे तर सांस्कृतिक, सामाजिक आणि वैयक्तिक विकासासाठीही व्यासपीठ उपलब्ध करून दिले गेले. एकूणच इंटी विद्यापीठ, मलेशियाचे संचालक डॉ. अशोकन वासुदेवन यांनी या अभ्यास दौऱ्या दरम्यान महत्वाचे मार्गदर्शन केले. भारतीय आणि मलेशियन विद्यार्थ्यांमधील संस्कृतीचा संवाद, स्थानिक परंपरांचा आदर आणि जागतिक दृष्टिकोन यामुळे हा दौरा संस्मरणीय ठरला. या अभ्यास दौऱ्यात प्रा. आशुतोष गरड यांच्या सह १४ विद्यार्थ्यांनी सहभाग घेतला होता. मलेशियाच्या या दौऱ्यामुळे स्वेरीतील संशोधनाला आणखी गती मिळाली आहे, हे मात्र निश्चित!
0 Comments