🛑 *जयकुमार गोरे साहेब, प्रणितीताई शिंदे यांच्या संस्कारांची चिंता करण्यापेक्षा दुष्काळाने उद्ध्वस्त झालेल्या शेतकऱ्यांच्या संसाराची चिंता करा; पालकमंत्री म्हणून प्रत्यक्ष मदतीचा हिशेब द्या!*

जयकुमार गोरे साहेब, खासदार प्रणितीताई शिंदे यांच्या संस्कारांवर बोलण्यापूर्वी स्वतःच्या राजकीय संस्कारांचा आरसा एकदा पाहा. आपले काळे संस्कार अंधारातून उजेडात आलेले आहेतच; त्यामुळे दुसऱ्यांना संस्कार शिकवण्यापेक्षा सोलापूरच्या दुष्काळग्रस्त शेतकऱ्यांच्या प्रश्नांना उत्तरे देणे अधिक योग्य ठरेल.

आज सोलापूर जिल्ह्यातील शेतकरी दुष्काळामुळे गंभीर संकटात आहे. पिके करपली आहेत, विहिरी आटल्या आहेत, जनावरांच्या पाणी-चाऱ्याचा प्रश्न निर्माण झाला आहे आणि शेतकऱ्यांचा संसार अडचणीत आला आहे. अशा परिस्थितीत खासदार प्रणितीताई शिंदे यांनी शेतकऱ्यांच्या प्रश्नांसाठी सरकारला जाब विचारला, तर त्यांना “संस्कार” शिकवण्याऐवजी दुष्काळाने होरपळलेल्या शेतकऱ्यांच्या संसाराची चिंता करा.

मुद्दा GR जाळला की नाही, हा नाही; मुद्दा GR मधील मदत शेतकऱ्याच्या खात्यात प्रत्यक्ष कधी जमा होणार, हा आहे.

दुष्काळ जाहीर केला म्हणजे शेतकऱ्याचे नुकसान भरून निघाले का?

GR काढला म्हणजे प्रत्येक नुकसानग्रस्त शेतकऱ्याच्या खात्यात मदत जमा झाली का?

१०० टक्के पंचनाम्यांचे आदेश दिले असतील, तर किती पंचनामे प्रत्यक्ष पूर्ण झाले?

जनावरांसाठी पुरेसा चारा आणि पिण्याचे पाणी उपलब्ध झाले का?

पालकमंत्री म्हणून जयकुमार गोरे यांनी सोलापूर जिल्ह्यातील जनतेला या प्रश्नांची स्पष्ट उत्तरे द्यावीत—

👉 सोलापूर जिल्ह्यातील किती दुष्काळग्रस्त शेतकऱ्यांच्या खात्यात प्रत्यक्ष मदत जमा झाली?

👉 एकूण किती निधी मंजूर झाला आणि त्यापैकी किती निधी प्रत्यक्ष वितरित झाला?

👉 किती पंचनामे पूर्ण झाले आणि किती पंचनामे अद्याप बाकी आहेत?

👉 चारा, पिण्याचे पाणी आणि टँकरसाठी प्रत्यक्ष किती निधी उपलब्ध करून दिला?

👉 सोलापूरच्या दुष्काळ निवारणासाठी पालकमंत्री म्हणून स्वतंत्रपणे किती निधी आणला?

👉 DPDC चा निधी दुष्काळ निवारणासाठी वळवण्याचे निर्देश दिले असल्यास, किती निधी वळवला आणि तो कुठे खर्च झाला?

👉 या निधीतून शेतकरी आणि ग्रामीण जनतेला प्रत्यक्ष काय फायदा झाला?

फक्त GR काढून, बैठका घेऊन आणि पत्रकार परिषदा घेऊन शेतकऱ्यांचे प्रश्न सुटत नाहीत. शेतकऱ्यांच्या बांधावर जाऊन त्यांची व्यथा समजून घ्यावी लागते आणि त्यानंतर प्रत्यक्ष मदत पोहोचवावी लागते.

म्हणूनच पालकमंत्री म्हणून जयकुमार गोरे यांनी आणखी एक महत्त्वाचा हिशेब सोलापूरच्या जनतेसमोर मांडावा—

👉 सोलापूर लोकसभा मतदारसंघातील किती दुष्काळग्रस्त शेतकऱ्यांच्या बांधावर तुम्ही प्रत्यक्ष जाऊन त्यांच्या अडचणी जाणून घेतल्या?

👉 दुष्काळग्रस्त किती गावांना तुम्ही प्रत्यक्ष भेट दिली?

👉 किती शेतकऱ्यांशी प्रत्यक्ष संवाद साधला?

👉 ग्रामविकास मंत्री म्हणून सोलापूर जिल्ह्यातील किती गावांच्या विकासासाठी ठोस कामे केली?

👉 पालकमंत्री म्हणून किती गावांमध्ये जाऊन जनतेच्या समस्या प्रत्यक्ष जाणून घेतल्या आणि त्यापैकी किती समस्या सोडवल्या?

केवळ वातानुकूलित कार्यालयात बसून बैठका घेणे, पत्रकार परिषदा घेणे आणि GR काढणे म्हणजे दुष्काळ निवारण नव्हे. दुष्काळग्रस्त शेतकऱ्यांच्या बांधावर जाऊन वास्तव परिस्थिती पाहणे, पंचनामे पूर्ण करून घेणे आणि नुकसानभरपाई थेट शेतकऱ्यांच्या खात्यात जमा करणे, ही खरी जबाबदारी आहे.

गोरे साहेब, तुम्ही म्हणता, GR जाळणाऱ्यांच्या बुद्धीची कीव येते. पण प्रश्न कागदाचा नाही; प्रश्न त्या कागदावरील आदेशाचा प्रत्यक्ष लाभ शेतकऱ्याला कधी मिळणार, हा आहे.

कीव करायचीच असेल तर पाण्याविना उभ्या असलेल्या शेतकऱ्याची करा; करपलेल्या पिकांकडे पाहत असलेल्या शेतकऱ्याची करा; दुष्काळामुळे उद्ध्वस्त झालेल्या त्याच्या संसाराची करा.

खासदार प्रणितीताई शिंदे यांनी शेतकऱ्यांच्या हक्कासाठी प्रश्न विचारला म्हणून त्यांच्या बुद्धीची किंवा संस्कारांची चिंता करण्याची गरज नाही. प्रश्न विचारणे हा लोकप्रतिनिधीचा अधिकार आणि जनतेप्रती असलेले कर्तव्य आहे.

GR चा खरा सन्मान तेव्हाच होईल, जेव्हा त्यातील मदत शेतकऱ्यांच्या खात्यात प्रत्यक्ष दिसेल.

त्यामुळे जयकुमार गोरे साहेब,

संस्कारांची चर्चा नको—शेतकऱ्यांच्या संसाराची चिंता करा.

राजकीय टोमणे नको—पालकमंत्री म्हणून केलेल्या कामाचा हिशेब द्या.

घोषणा नकोत—प्रत्यक्ष मदत द्या.

GR चा गाजावाजा नको—शेतकऱ्यांच्या खात्यात पैसे जमा करा.

पत्रकार परिषदा नकोत—शेतकऱ्यांच्या बांधावर जा.

सोलापूरच्या दुष्काळग्रस्त शेतकऱ्यांना आता भाषणांची नाही, तर प्रत्यक्ष मदतीची गरज आहे. पालकमंत्री म्हणून त्या मदतीचा संपूर्ण लेखाजोखा जनतेसमोर मांडा!

◼️ *तिरुपती परकीपंडला ( tp)*

मिडिया प्रमुख , सोलापूर शहर जिल्हा काँग्रेस कमिटी

▬▬▬ஜ۩(tp)۩ஜ▬▬▬