.🛑 *खासदार प्रणिती शिंदे यांची मोहोळ तालुक्यातील सीना नदीकाठच्या एकुरके, घाटणे, कोळेगांव, रामहिंगणी, मुंढेवाडी, नांदगांव, वडवळ, साबळेवाडी (पोफळी), विरवडे खुर्द, शिरापुर (मो) या अतिवृष्टी आणि पूरग्रस्त गावांना भेट; शेतकऱ्यांच्या मदतीसाठी ठोस मागण्या*

मोहोळ, दि. ०६ ऑक्टोबर २०२५

मोहोळ तालुक्यातील सीना नदीकाठच्या परिसरावर अतिवृष्टी आणि पुराचा जबर फटका बसला असून, शेतातील पिकांसह माती वाहून गेली, घरांची पडझड झाली, पशुधन व संसारोपयोगी वस्तूंचे प्रचंड नुकसान झाले आहे. अनेक ठिकाणी रस्ते आणि पूल वाहून गेल्याने गावांचा संपर्क तुटला आहे, तर अनेक शेतांमध्ये अजूनही पाणी साचलेले असून शेतकऱ्यांच्या हाती काहीच उरलेले नाही, अशी अत्यंत गंभीर परिस्थिती निर्माण झाली आहे.

या भीषण परिस्थितीचा आढावा घेण्यासाठी सोलापूर लोकसभा मतदारसंघाच्या खासदार प्रणिती शिंदे यांनी आज मोहोळ तालुक्यातील सीना नदीकाठच्या एकुरके, घाटणे, कोळेगाव, रामहिंगणी, मुंढेवाडी, नांदगाव, वडवळ, साबळेवाडी (पोफळी), विरवडे खुर्द आणि शिरापुर (मो.) या अतिवृष्टी आणि पूरग्रस्त गावांना भेट दिली. त्यांनी थेट शेतकरी व ग्रामस्थांशी संवाद साधत त्यांच्या अडचणी जाणून घेतल्या आणि नुकसानीची प्रत्यक्ष पाहणी केली.

“संकट फार मोठं आहे आणि परिस्थिती अजूनही गंभीर आहे, पण आम्ही तुमच्या सोबत आहोत,” असे सांगत खासदार प्रणिती शिंदे यांनी शेतकऱ्यांना धीर दिला. त्यांनी प्रशासनाला तात्काळ राहिलेले पंचनामे पूर्ण करून मदत पुरवण्याचे निर्देश दिले. तसेच अन्नधान्य किट, चादरी, कपडे, पिण्याचे पाणी बॉटल अशा जीवनावश्यक वस्तूंच्या स्वरूपात प्रत्यक्ष मदत पोहोचवण्याचे काम आजपर्यंत केले असल्याची माहितीही त्यांनी दिली.

या भेटीदरम्यान खासदार प्रणिती शिंदे यांनी शासनाकडे पुढील ठोस मागण्या मांडल्या —

१) माती वाहून गेलेल्या जमिनींसाठी स्वतंत्र नुकसानभरपाई द्यावी.

२) सिना कोळेगाव प्रकल्पातून उन्हाळ्यात शेतीसाठी पाणी सोडावे, ज्यामुळे भविष्यातील पूरस्थितीवर नियंत्रण ठेवता येईल, तसेच सिना नदीला कालव्याचा दर्जा देण्यात यावा.

३) पुरामुळे बाधित गावांचे पुनर्वसन करण्यात यावे.

४) अतिवृष्टी व पुरग्रस्त शेतकऱ्यांच्या मुलांची शैक्षणिक फी माफ करावी.

५) वाहून गेलेल्या शेती आणि पिकांसाठी स्वतंत्र पंचनामे करून त्वरित नुकसानभरपाई द्यावी.

६) पूरामुळे कोसळलेले विद्युत खांब आणि डीपी त्वरित दुरुस्त करावेत.

७) पूरग्रस्त भागातील रस्ते तातडीने दुरुस्त करावेत.

८) बाधित शेतकऱ्यांना प्रति हेक्टर पन्नास हजार रुपयांचे अनुदान द्यावे.

९) दिवाळीपूर्वीच शेतकऱ्यांना नुकसानभरपाई मिळावी.

या सर्व मागण्यांवर शासनाने तातडीने कार्यवाही न केल्यास आंदोलन छेडण्याचा इशाराही खासदार प्रणिती शिंदे यांनी दिला.

👉 अतिवृष्टी आणि पुरामुळे उद्ध्वस्त झालेल्या शेतकऱ्यांच्या जीवनात दिलासा मिळवून देण्यासाठी खासदार प्रणिती शिंदे सातत्याने प्रयत्नशील आहेत. सरकारने आश्वासनांवर न थांबता ठोस मदत आणि निर्णायक कृती करण्याची मागणी केली आहे.

या दौऱ्यात तालुका अध्यक्ष सुलेमान तांबोळी, जिल्हा उपाध्यक्ष राजेश पवार, पृथ्वीराज ढवण, जगन्नाथ कोल्हाळ, जिल्हा समन्वयक मनोज यलगुलवार, नाना ढवण, पंडित ढवण, ऋतुराज देशमुख, मनोज देशमुख, मधुकर पाटील, सुरेश आप्पा शिवपुजे, श्रीकांत देशमुख, राहुल व्यवहारे, शशिकांत पाटील, अनिकेत पाटील, गोपाळ पवार, हनुमंत पाटील, जयवंत जाधव, बाबा गाडे, रतन कसबे, आनंद बळवंतराव, मल्हारी वाघमारे, धर्मराज वाघमारे, रुक्मिणी चंदनशिवे, बाजीराव पाटील, बंडू चटके, श्रीधर पाटील यांच्यासह शेतकरी, ग्रामस्थ मोठ्या संख्येने उपस्थित होते. 

▬▬▬ஜ۩(tp)۩ஜ▬▬▬