बातमी - न्यु सातारा कॉलेज ऑफ इंजिनिअरिंग अँड मॅनेजमेंट (पॉलिटेक्निक), कोर्टी, पंढरपूर येथील सिव्हील अभियांत्रिकी विभागात पालक सभेचे आयोजन उत्साहपूर्ण वातावरणात करण्यात आले. या कार्यक्रमाचे प्रमुख उद्दिष्ट विद्यार्थ्यांच्या शैक्षणिक, औद्योगिक तसेच वैयक्तिक प्रगतीबाबत पालकांना सविस्तर माहिती देणे आणि महाविद्यालय व पालक यांच्यातील संवाद अधिक दृढ करणे हे होते. कार्यक्रमाच्या अध्यक्षस्थानी महाविद्यालयाचे प्राचार्य प्रा. विक्रम लोंढे होते. प्रमुख पाहुणे म्हणून ट्रैनिंग अँड प्लेसमेंट ऑफिसर प्रा. विशाल बाड, सिव्हील अभियांत्रिकी विभागप्रमुख प्रा. विश्वनाथ कुंभार तसेच सर्व विभाग प्रमुख, विभागातील सर्व शिक्षकवर्ग आणि पालक मोठ्या संख्येने उपस्थित होते. कार्यक्रमाची सुरुवात प्रा. सुरज खिलारे यांच्या प्रास्ताविकाने झाली. या वेळी पालक प्रतिनिधी श्री शेख सर आणि श्रीमती दगडे पाटील मॅडम यांचा सत्कार करण्यात आला. त्यानंतर प्राचार्यांनी आपल्या अध्यक्षीय भाषणात विद्यार्थ्यांच्या सर्वांगीण विकासासाठी पालकांच्या सहकार्याचे महत्त्व अधोरेखित केले. त्यांनी विद्यार्थ्यांना नियमित उपस्थिती, प्रयोगशाळेतील सहभाग, प्रकल्प कार्य, औद्योगिक भेटी आणि प्रशिक्षण यांवर भर देण्याचे आवाहन केले.
यानंतर विभागप्रमुखांनी विभागातील शैक्षणिक निकाल, विद्यार्थी उपस्थिती, चालू असलेले विविध प्रकल्प, औद्योगिक भेटी, स्पर्धा परीक्षांची तयारी तसेच रोजगार संधी यांची सविस्तर माहिती पालकांसमोर मांडली. ट्रैनिंग अँड प्लेसमेंट ऑफिसर यांनी प्लेसमेंट उपक्रमांची माहिती देत विद्यार्थ्यांना मिळणाऱ्या संधींबाबत मार्गदर्शन केले. पालकांनी विद्यार्थ्यांच्या प्रगतीबाबत समाधान व्यक्त केले आणि काही रचनात्मक सूचना मांडल्या. तसेच शिक्षकवर्गाच्या प्रयत्नांचे कौतुकही केले.या वेळी विद्यार्थी प्रतिनिधी विजय चव्हाण, कुमारी साळवी सिंग आणि आरती सुरवसे यांनी आपले मत व्यक्त केले. विद्यार्थ्यांमध्ये जबाबदारीची भावना निर्माण व्हावी यासाठी पालक आणि शिक्षक यांनी एकत्रित प्रयत्न करण्याचे ठरविण्यात आले. तसेच या वेळी पालकांनी महिन्यातून एकदा कॉलेज मध्ये भेट देऊन विद्यार्थ्यांची प्रगती जाणून घ्यावी असे ठरविण्यात आले. या कार्यक्रमाचे सूत्रसंचालन प्रा. सुरज खिलारे यांनी केले, तर आभार प्रदर्शन प्रा. सौरभ कुलकर्णी यांनी केले. कार्यक्रमाच्या यशस्वी आयोजनासाठी सिव्हील अभियांत्रिकी विभागातील प्रा.अभिजित येडगे, प्रा. ऋतुजा पवार, प्रा. वनिता चव्हाण आणि लॅब असिस्टंट मिस. पायल बाबर, आणि विद्यार्थ्यांनी परिश्रम घेतले. कार्यक्रमानंतर पालक आणि शिक्षक यांच्यात परस्पर संवाद सत्र घेण्यात आले, ज्यामध्ये विद्यार्थ्यांच्या शैक्षणिक आणि व्यावहारिक प्रगतीबाबत सविस्तर चर्चा झाली. संपूर्ण कार्यक्रम उत्साहपूर्ण आणि फलदायी ठरला.
0 Comments