स्वेरीज् कॉलेज ऑफ इंजिनिअरींगच्या प्रा. प्राजक्ता सातारकर यांना पीएच.डी. प्राप्त

पंढरपूर- गोपाळपूर (ता.पंढरपूर) येथील श्री. विठ्ठल एज्युकेशन अँड रिसर्च इन्स्टिटयुट संचलित कॉलेज ऑफ इंजिनिअरिंग (ऑटोनॉमस) च्या कॉम्प्यूटर सायन्स अँड इंजिनिअरिंग विभागात कार्यरत असलेल्या प्रा. प्राजक्ता अभिषेक सातारकर यांना नुकतीच पीएच.डी. प्राप्त झाली आहे. त्यांनी आपला शोधप्रबंध नांदेड मधील स्वामी रामानंद तीर्थ मराठवाडा विद्यापीठामध्ये सादर केला होता. पीएच.डी. प्राप्त केल्यामुळे डॉ. प्राजक्ता सातारकर यांचा स्वेरीमध्ये सत्कार करण्यात आला. त्यांनी अभियांत्रिकी मधील कॉम्प्यूटर सायन्स अँड इंजिनिअरिंग या विभागात ‘इफीसिएंट फ्रेमवर्क डेव्हलपमेंट फॉर एन्हन्सिंग द परफॉर्मन्स ऑफ लायफाय बेस्ड नेटवर्क' या विषयावर आपला शोधप्रबंध सादर केला होता. या यशाबद्धल त्यांचे सर्वत्र कौतुक होत आहे. 

       डॉ.जी.व्ही चौधरी यांच्या मार्गदर्शनाखाली, स्वेरीचे संस्थापक व कॉलेज ऑफ इंजिनिअरींगचे प्राचार्य डॉ. बी.पी.रोंगे यांच्या प्रेरणेने प्रा. प्राजक्ता सातारकर यांनी पीएच.डी. पूर्ण केली आहे. प्रा. प्राजक्ता सातारकर यांनी ऑप्टीकल कम्युनिकेशन क्षेत्रात महत्त्वपूर्ण संशोधन केले आहे. या संशोधनात त्यांनी नवीन प्रोटोकॉल डिझाईन केले आहे. प्रा. सातारकर यांनी पीएच.डी. दरम्यान ५ संशोधन पेपर प्रतिष्ठित नियतकालिकांमध्ये प्रकाशित केले आहेत आणि ४ पेपर आंतरराष्ट्रीय परिषदांमध्ये सादर केले आहेत तसेच आंतरराष्ट्रीय जर्नल मधून त्यांचे २५ शोधनिबंध प्रकाशित झाले आहेत. प्रा. प्राजक्ता सातारकर यांचे हे यश केवळ त्यांच्या समर्पण आणि कौशल्याचे प्रतीक नाही, तर स्वेरी महाविद्यालय, पंढरपूरला ही गौरवान्वित करणारे असे आहे. डॉ. प्राजक्ता सातारकर ह्या स्वेरी संचालित कॉलेज ऑफ इंजिनिअरींगच्या कॉम्प्यूटर सायन्स अँड इंजिनिअरिंग या विभागामध्ये गेल्या १८ वर्षांपासून उत्कृष्टपणे ज्ञानदान करत आहेत. पीएच.डी. प्राप्त झाल्याबद्दल डॉ. प्राजक्ता सातारकर यांचा गांधी जयंतीच्या निमित्ताने पुण्याच्या रिलायन्स इंडस्ट्रीज लिमिटेडच्या इनोव्हेशन विभागाचे व्हाईस प्रेसिडेंट श्रीकांत देव व सौ. देव यांच्या हस्ते व मान्यवरांच्या उपस्थितीमध्ये सत्कार करण्यात आला. संस्थेचे संस्थापक व कॉलेज ऑफ इंजिनिअरींगचे प्राचार्य डॉ. बी.पी. रोंगे, संस्थेचे अध्यक्ष अशोक भोसले, उपाध्यक्ष सुरेश राऊत, सचिव डॉ. सुरज रोंगे, इतर विश्वस्त व पदाधिकारी, तसेच संस्थेअंतर्गत असणाऱ्या बी. फार्मसीचे प्राचार्य डॉ. एम. जी. मणियार, डिप्लोमा इंजिनिअरिंगचे प्राचार्य डॉ. एन.डी. मिसाळ, डी. फार्मसीचे प्राचार्य प्रा. सतिश मांडवे, इंजिनिअरींगच्या उपप्राचार्या डॉ. मिनाक्षी पवार, कॉम्प्यूटर सायन्स अँड इंजिनिअरिंगच्या विभागप्रमुख डॉ. एस.पी.पवार, अधिष्ठाता, विभागप्रमुख, प्राध्यापक, शिक्षकेतर कर्मचारी व विद्यार्थ्यांनी डॉ. प्राजक्ता सातारकर यांचे अभिनंदन केले आहे.