आदर्श प्राथमिक विद्यालयात मतदान जनजागृती अभियान उत्साहात संपन्न

पंढरपुर(प्रतिनिधी)

शनिवार, दिनांक ८ नोव्हेंबर २०२५ रोजी आदर्श प्राथमिक विद्यालयात मतदानाचे प्रमाण वाढविण्यासाठी मतदान जनजागृती अभियान मोठ्या उत्साहात राबविण्यात आले. लोकशाहीतील सर्वात मोठ्या हक्काचे महत्त्व बालमनात रुजविण्यासाठी विविध उपक्रमांचे आयोजन करण्यात आले होते.

या अभियानांतर्गत इयत्ता चौथीच्या विद्यार्थ्यांनी प्रभात फेरी काढून मतदानाविषयी प्रभावी घोषणा दिल्या. विद्यार्थ्यांनी स्वतः तयार केलेल्या मतदानविषयक घोषवाक्यांच्या पट्ट्या हातात घेऊन नागरिकांमध्ये जागरूकतेचा संदेश दिला. तसेच चौथीतील विद्यार्थ्यांनी सादर केलेल्या पथनाट्याने सर्वांचे लक्ष वेधून घेतले.

इयत्ता पाचवीच्या विद्यार्थ्यांसाठी वक्तृत्व स्पर्धा, वादविवाद स्पर्धा आणि रिल्स स्पर्धा आयोजित करण्यात आल्या. इयत्ता तिसरीत निबंध लेखन स्पर्धा, तर इयत्ता दुसरीत चित्रकला स्पर्धा घेण्यात आली. सर्वच उपक्रमांमध्ये विद्यार्थ्यांचा उत्स्फूर्त सहभाग पाहायला मिळाला.

या सर्व उपक्रमांच्या यशासाठी शाळेतील सर्व शिक्षक व कर्मचारीवर्ग यांनी अथक परिश्रम घेतले, तसेच मुख्याध्यापिका सौ. घंटीबाई यांनी मार्गदर्शन केले.

या उपक्रमास संस्थेचे अध्यक्ष मा. श्री. सतीशजी पुरंदरे, माजी अध्यक्षा मा. वीणाताई जोशी, सदस्य मा. सौ. रेखाताई उंबरकर, डॉ. अनिल जोशी, सचिव ॲड. ज्ञानेश आराध्ये, मा. आमदार रेखाताई भालेराव, श्री. प्रशांत कुलकर्णी सर, डॉ. तेजस भोपटकर, व श्री. प्रसाद संत सर यांनी शुभेच्छा पाठवून उपक्रमाचे कौतुक केले.

या जनजागृती उपक्रमामुळे विद्यार्थ्यांमध्ये मतदानाबद्दलची जाणीव व लोकशाहीबद्दल आदर निर्माण झाला असून, शाळेचा हा उपक्रम सर्वांसाठी प्रेरणादायी ठरला आहे.